Song

• Malayalam

  കൺകളെ കണ്ടിടുക കാൽവറി മലമുകളിൽ 
  കാൽകരം ആണികളാൽ തൂങ്ങിടുന്നു പ്രാണനാഥൻ

  1 സ്വന്തശിഷ്യനായ യൂദാ ഏൽപ്പിച്ചു യേശുവിനെ 
  എന്തു കഷ്ടം ക്രൂരജനം കൈയേറ്റി നല്ലവനെ 
  സ്വന്ത ഇഷ്ടം പോലെയല്ല താതനിഷ്ടം നിറവേറാൻ
  സ്വന്ത ദേഹം ഏൽപ്പിച്ചവൻ ഹന്ത ക്ലേശം ഏറ്റിടുന്നു

  2 വലിയൊരു മരക്കുരിശെൻ യേശുവിനെ ഏൽപ്പിച്ചു 
  ഝടുഝെടെ നടയെന്നു പടയാളികളുത്തരവായ് 
  പടുപാടുകളേറ്റു കൊണ്ട് നടന്നല്ലോ കുരിശേന്തി 
  ഇടയ്ക്കിടെ താൻ വീണു കൊണ്ടും 
  ഇടയ്ക്കിടെ താൻ ഓടി കൊണ്ടും

  3 ഗോൽഗോഥാ മലമുകളിൽ  കുരിശേന്തി കയറിയല്ലോ 
  പടയാളികൾ യേശുവിനെ കുരിശിൽ തറച്ചുവല്ലോ 
  തുളച്ചല്ലോ ആണികളാൽ കൈകളെയും കാൽകളെയും 
  മരത്തോടു ചേർത്തവനെ അടികളോടും ഇടികളോടും

  4 ഘോരമാം മുൾക്കിരീടം തലയിൽ വെച്ചാഞ്ഞടിച്ചു 
  ഘോര മുറിവുകളാലതി വേദന ഏറ്റിടുന്നു 
  ഒഴുകിടുന്നു പുണ്യനിണം അടിയന്റെ  വിടുതലിനായ്
  ഒരു വാക്കും ഓതുന്നില്ല ഇതുപോലെ സ്നേഹമുണ്ടോ

  5 ഏറെ വേദന ഏറ്റതിനാൽ ഏകപുത്രൻ നിലവിളിച്ചു 
  ഏലോഹി ഏലോഹി ലമ്മ ശബക്താനി 
  കേട്ടു നിന്നവർ ചൊന്നുടനെ ഏലീയാവെ വിളിക്കുന്നു 
  കെട്ടിടാം നാം ആരുവരും ഇവനെ രക്ഷിപ്പാനായ്

  6 ഗഗനേ തൻ മകനെ ഓർത്തി വേദന പൂണ്ടുവിതാ 
  മുകളിൽ നിന്നടിയോളം തിരശ്ശീല മുറിച്ചുവല്ലോ 
  ആരെയും ഭയമില്ലാതെ ശതാധിപൻ ഉര ചെയ്തുടനെ 
  ആയവൻ ദൈവത്തിൻ പുത്രൻ തന്നെ സത്യം

  7 ആകാശം തല ചായിച്ചനുശോചനം അറിയിച്ചു 
  അരുണൻ തൻ പ്രഭ നീക്കി ഇരുളാൽ പ്രതിക്ഷേധിച്ചു 
  ഭൂമി ഞെട്ടി വിറച്ചുടനെ പാറകൾ പിറന്നു പല 
  കല്ലറ തുറന്നു മൃതർ വിണ്ണിലേക്കു ഗമിച്ചല്ലോ

  8 നല്ല വിലാവിൽ ദുഷ്ടർ കുത്തിയല്ലോ കുന്തവുമായ് 
  വല്ലഭാ നീ ചൊരിയും രക്തവും കാണുന്നു ഞാൻ 
  എന്തൊരു ഖേദമിതു ദൈവത്തിൻ ഏകജാതൻ 
  എന്തു ദോഷം ചെയ്തു ഇതിനെന്റെ ദോഷം കാരണമെ

  9 ഇതുപോലൊരു സംഭവമീയുലകിൽ വേറില്ലറിക 
  ഇവനോടുപമിപ്പാൻ ഇനിയാരും വരികില്ലറിക 
  ഇവനെ നാമറിയുന്നു ഇവനിൽ വസിക്കുന്നു 
  ഇവനിൽ നിത്യം മറയും ഇഹവാസം തീരുമ്പോൾ